Saptoe. 5 Januari 1929.
I. Pengalaman Saja…
Tida selama'nja saja mendjadi orang jang sebage sekarang, jaitoe jang setiap waktoe moesti toenggoe dateng'nja makian dan tjatjian, sebab kata'nja saja soeka mengorek orang dalem soerat-kabar.
Doeloe sekali, jaitoe sebelon'nja saja taoe toelis tentang ini atawa itoe, saja pernah djoega oedji peroentoengan saja dengen djalan mendjadi verkooper dari satoe firma jang boeka peroesahaan auto. (*?? Ini betoel atawa tida)
Ach, itoe waktoe pembatja, keada’an saja ada laen sekali dari sekarang. Boleh di bilang setiap hari saja bisa sampret auto ini atawa itoe, dengen mana saja keloear kota. Dengen pendek, berhoeboengan dengen saja poenja djabatan, saja bisa djoeal laga sebage toean besar.
Tapi itoe pekerdja’an djoega ada tida baek'nja. Lantaran tersoeroeng oleh keinginan boeat dapetken commissie seberapa bisa banjak'nja, pelahan-lahan saja tida segan boeat gorok sadja barang siapa jang saja ketemoe di tengah djalan.
Sesoedah'nja mandi, ganti pakean jang bersih, saja tida mempoenjai laen pikiran dari pada:
„Awas barang siapa ketemoe goea, goea potong leher'nja; tida perdoeli orang siapa djoega!”.
Satoe verkooper jang baek, tida bisa tida ia moesti berlakoe kedjem dan pande goenaken ia poenja piso-tjoekoer jang tadjem. Tida pandang sobat atawa sanak, asal sadja ia masoek kedalem djiretan'nja, teroes door di gorok sampe kena toelang'nja.
Satoe kedjadian dari itoe waktoe jang maoe saja tjeritaken pada pembatja:
Pada soeatoe hari saja oleh thauwke di wadjibken djoeal doea auto jang soedah tida bisa di bilang terlaloe baroe. Kendati saja taoe itoe, sebage satoe verkooper jang sedjati, saja siarken tjerita jang itoe auto sebetoel'nja masih baroe di pake beberapa boelan sadja, djalan'nja masih baek dan masih koeat nandjak tandjakan jang paling tinggi.
Achir'nja djoega saja bisa dapetken satoe sobat, pada siapa saja djoeal obrolan jang itoe doea auto (jang sebetoel'nja soedah ampir tida bisa di pake lagi) masih bisa mentjoekoepin semoea permintaan; baek di pake sendiri, maoepoen boeat djalanken sebage taxi.
Soepaia ia teroes bisa djadi, saja bajangken pada'nja, bagimana peroesahaan taxi kasih banjak harepan, sedeng risico boleh di bilang sama sekali tida oesah di pikoel. Itoe doea auto oepama bisa di masoeken assurantie, hingga segala keroesakan soedah „gedekt”, tjoema tinggal kita tarik sadja keoentoengan setiap hari.
Saja poenja sobat pertjaja omongan'nja itoe verkooper. Di itoe hari djoega ia teken contract pembelian.
Bagimana kesoedahan dari itoe doea auto, ini saja tida perdoeli lagi. Paling perloe djika commissie soedah masoek dalem kantong, si „sobat” boleh hidoep atawa mampoes dengen auto'nja.
Inilah pembatja ada pengalaman saja sebage verkooper. Boleh djadi lantaran itoe, sedikit banjak saja moesti trima dorahaka'nja, hingga maski saban boelan saja bisa tarik keoentoengan jang loemajan dari pekerdja’an gorok orang, toch achir'nja semoea tida keliatan oedjoet'nja. Malahan saja di itoe waktoe jang belakangan ini mempoenjai banjak oetang.
Sebab semoea ternjata jang dari itoe pekerdja’an saja soesah bisa harep apa² lagi, hingga saja ambil poetoesan boeat mendjadi satoe „journalist”, kendati boeat itoe saja belon pernah poenja didikan atawa pengalaman apa².
Tapi ini tida oesah di boeat sangkoetan: asal sadja kita maoe, biarpoen masih toenggoe sampe lama sekali, toch satoe kali bisa kesampean kemaoean kita.
Dan begitoelah pembatja, maka'nja sekarang saja soedah toeker boeloe.
II. Djalannja Soesoer.
Soesoer, pembatja, ada satoe benda jang pegang rol jang penting dalem penghidoepan di Indonesia.
Betoel djoega tida ada satoe orang jang bisa doega lebih doeloe, bagimana satoe boetir soesoer bisa pengaroehin keada’an politik dari ini negri. Tapi memang soedah mendjadi kebiasa’an dalem alam. Apa jang tida terdoega jang aken kedjadian. Sebagimana djoega tida ada satoe manoesia jang bisa ramalken lebih doeloe bagimana si Simin, pekerdja’annja sopir, satoe kali aken pegang nasib’nja Indonesia, begitoe djoega tida ada satoe politicus, biarpoen jang paling pande dan oeloeng, jang bisa tjioem lebih doeloe, bagimana satoe kali doenia politiek Indonesia aken di bikin tergoentjang oleh menggeloendoeng’nja soesoer.
Soesoer dan soesoer ada banjak matjem. Ada soesoer jang oemoernja soedah tiga hari, ada soesoer jang baroesan di glintir dan ada soesoer basah lantaran terlaloe lama di-emoot.
Perlahan-lahan soesoer aken ambil kedoedoekan jang teroetama dalem penghidoepan kita, hingga pembatja tida oesah heran djika satoe kali pembatja aken menampak satoe watenschappelyke verhandeling tentang soesoer.
Tida lama lagi di Indonesia aken didiriken sekolah-tinggi student² jang beladjar di itoe midrasa bisa ambil graad’nja dalem soesoer-isme.
Achir’nja soesoer aken ambil kedoedoekan dalem volksraad kerna sebagimana di atas soedah di bilang, tambah lama soesoer tambah mendjadi „soal” jang penting, hingga boeat itoe perloe sekali di dalem volksraad di adaken tempo speciaal meloeloe boeat roendingken itoe soal.
Satoe dinest aken di diriken oentoek preksa dan pahamken sampe dimana berbahajanja soesoer boeat sociaal dan economie, boeat kesehatan rakjat.
Dokter² specialist dalem ilmoe preksa soesoer aken diwadjibken preksa dan djaga djangan sampe itoe soesoer bisa membawa kebintjana’an. Saban minggoe ia orang moesti masoeken verslag tentang penjelidikan jang soedah di lakoeken.
Boeat soesoer dalem speciaal begrooting moesti di adaken post²; moetie² jang di madjoeken boeat bela kedoedoekan’nja soesoer, banjak’nja tida bisa di itoeng.
Pengabisan itoe soesoer boekan saja bikin perobahan besar dalem politik Indonesia, hanja ia djoega pengaroehin djalan’nja politiek doenia. Volkenbond tida bisa tida moesti toeroet tjampoer tangan dan sebage symbool dari kebesaran dan penting’nja soesoer, sesoeatoe lid dari volkenbond di wadjibken moesti membekel soesoer bila bersidang.
Betoel boeat itoe waktoe soesoer masih belon sampe di poentjak dari ia poenja kebesaran tapi permoelaan dari itoe, pembatja soedah bisa liat dengen terang jang ia ambil kedoedoekan penting dalem penghidoepan prempoean Indonesia, jaitoe dalem penghidoepan kita jang tinggal di ini bagian dari doenia.
Soesoer tida sedikit bantoe woedjoetken angen² jang dikandoeng oleh kellogg; soal peloetjoetan sendjata bisa dipetjahken dengen itoe. dan kaloe toch satoe kali moesti terbit lagi perang doenia, djiwa manoesia tida oesah di korbanken biarpoen dalem medan pertempoeran jang paling heibat, kerna orang tida lagi perang dengen goenaken gas beratjoen dan peloeroe, hanja melaenken saling timpoek sadja dengen soesoer. Siapa jang kena langgar itoe boetir, tjoema djatoh kelenger sadja dan teroes di tangkep boeat di djadiken orang tawanan, sebegitoe lama itoe perang soesoer masih belon berachir.
Dari apa jang soedah ditoelis di atas pembatja bisa boektiken sendiri bagimana segala apa, biarpoen jang doeloe sama sekali tida berharga boeat dipandeng atawa diroendingken, satoe kali moesti bisa ambil kedoedoekan jang penting.
Menggeloendoeng’nja soesoer tida bisa didoega doeloe kedjoeroesan mana, sebage djoega tida bisa di ramalken bagimana satoe kali djalan’nja politik Indonesia bila di kemoediken oleh itoe tangan jang doeloe’nja pernah kemoediken satoe Chevrolet atawa Ford.
III. Sang Hoofdartikel.
Liat Vs Pewarta
Tjamboek Berdoeri.
Saptoe, 12 Djanoeari 1929.
I. Peranakan Tionghoa poenja Stijl
Dengen berobah’nja zaman koeno mendjadi zaman kemadjoean tentoe sadja segala-galanja djoega toeroet berobah. Oepama 20 taon di moeka, djika satoe djedjaka Tionghoa (peranakan) di pinang satoe gadis dari bangsa’nja, djika familie’nja si gadis merasa setoedjoe pada itoe djedjaka, pasti jang terseboet belakangan ini di datengken di roemah’nja, kata’nja boeat „ditontonin”.
Pertanja’an apa sadja jang si djedjaka moesti djawab di hadepan itoe sekoempoelan oewa² dan entjim² jang semoea mendjadi familie’nja ia poenja Entay (*inget tjerita San-Pek Engtay), ini pembatja jang mendjadi orang Tionghoa bisa doega sendiri.
Belon tjoekoep dengen itoe, malah menoeroet tjerita’nja, ada satoe djedjaka jang koetika dateng boeat di tontonin, selaen’nja moesti mendjawab setaoe brapa pertanja’an, djoega di kasih satoe kantong jang…… di isi sama oewang perak, dari moelai roepiahan sampe etjean. Ini oewang si djedjaka moesti itoeng berapa besar djoemlah’nja, agar si bakal tio-em, tio-em dan setaoe siapa lagi mengetahoein jang si candidaat orangnja pinter, kerna soedah bisa itoeng oewang.
Ini examen di lakoeken di masanja pekerdja’an mendjadi „baba-kasier” di anggep ada pekerdja’an jang paling djempol.
Sekarang keada’an ada laen. Boekan lebih lama lagi si kantong doeit jang di moentjoelken, hanja sekarang di tanja, si „tjoetjoe” poenja kerdja apa, doeloe’nja taoe sekolah apa dan kaloe bisa tentoe sadja jang paling banjak kans boeat di trima, jang di belakang nama’nja dipasangin titel ini atawa itoe.
Begitoelah vereischten, permintaan, sekarang dalem doenia perkawinan.
Tida lama lagi, sebab toch sekarang radio, makin lama makin mendjadi terkenal, orang tjari mantoe atawa jang anak’nja di lamar, tida oesah tjari keterangan lagi pada segala kenalan, tida oesah minta dateng’nja si djedjaka di roemah’nja, hanja tjotjoken sadja golflengte’nja, orang bisa ambil examen’nja si candidaat dengen tida oesah tjapeken diri selaen’nja goenaken koeping’nja.
Apa lagi sekarang otak manoesia soedah bisa dapetken telephisie, dengen bekakas mana orang bisa ambil potret dari tempat jang djaoeh sekali.
Djika ada satoe djedjaka jang ingin menikah dan ia soedah melamar satoe gadis, ia tida oesah boewang tempo dan oewang boeat dateng mertamoe, hanja tjoekoep ia djalan² sadja di depan’nja itoe bekakas, soepaia familienja ia poenja Engtay bisa njataken dengen mata kepala sendiri, apa djalan’nja tida kentjat (*pintjang; miring), apa matanja tida koetik, sedeng boeat keer soeara’nja, soedah ada bekakas radio.
Pembatja liat sendiri, bagimana ringkes itoe soal pelamaran bisa di beresken.
Dan besok, djika itoe peminangan ketampan, itoe sepasang soeami-istri tida perloe lagi „Sodja-aboe”, tapi soedah tjoekoep bila ia orang hadepin sadja bekakas radio dan telephisie, di depan mana jang orang moesti bitjara dan sodja-koewi. Sementara di itoe waktoe, di saban roemah famillie’nja djoega di sediaken itoe doea matjem bekakas. Jang masoek golongan „toea²” tjoema hadepin radio dan telephisie dan dengen begitoe ia orang bisa oetjapken pemberian slamet’nja, serta bisa liat sekali, bagimana anak’nja sekarang soedah „djadi orang” dan sedeng hoendjoeken hormat’nja!
Ja, inilah berkah’nja orang jang idoep di ini zaman kemadjoean.
Sebagi orang Tionghoa peranakan, saja sendiri rasa’nja bingoeng tida keroean djika pikirin kita poenja keada’an jang tida tentoe, jang mana di sebabken lantaran toeroen-temoeroen kita tinggal disini, hingga pantes kaloe di bilang jang adat-istiadat kita orang Tionghoa Peranakan lebih mirip pada masakan Tjap Tjhay dari pada adat-istiadat jang oemoemnja terdapet di laen² bangsa.
Orang Tionghoa soedah begitoe mendjadi biasa boeat tiroe sadja segala apa jang terdapet pada laen bangsa, hingga kadang² ia bisa bentrokan sama diri’nja sendiri.
Oepama, boeat ambil salah satoe tjontoh, djika kita menikah, kita rasa’nja tida poewas djika tjoema King Thie Kong sadja, hanja itoe oepatjara „sembajang Toehan Allah” djoega moesti direndengken sama slametan.
Kata’nja soepaia tida di makan „kolo” alias setan jang roepanja melaenken aoes sadja sama orang jang maoe „djadi orang”. Satoe slametan di bikin dan tambah banjak orang jang toeroet doedoek boeat mendoa dan makan, lebih baek, soepaia anak’nja djoega banjak. Ini jang teroetama di harep dan poedjiken oleh prempoean Tionghoa jang dilahirken di zaman koeno, tapi jang sampe sekarang masih hidoep.
Tjoema sajang’nja, kenapa djoega tida di bikin slametan, soepaia boekan sadja djoemlah’nja anaknja bertambah, tapi djoega penghasilan si candidaat bapa dari setaoe berapa poeloeh anak.
Zaman sekarang ada zaman soesah, hingga kaloe kita tjoema dislametin sadja boeat bisa dapet banjak toeroenan, tapi di seblahnja kita tida di slametin soepaia redjeki tambah moeloer, pasti ini aken terbitken satoe keada’an jang pintjang, jang mana bisa berachir si bapa oetang’nja noempoek sampe liwatin koeping! (*kiasan hal jang tida pantes; baek).
Dalem penghidoepan orang Tionghoa peranakan soedah kemasoekan begitoe banjak matjem² adat dan kebiasa’an dari laen bangsa, hingga lama² ia sama sekali tida bisa bedaken apa jang bergoena boeat ia dan apa jang tida. Achir’nja kita poenja kepandean tjoema bisa maen anoet sadja sebage automaat, sebage bekakas jang tida bisa bergerak sendiri.
Beberapa poeloe taon jang doeloe kita maen toeroet sadja apa jang orang² jang mendjadi pendoedoeknja asli dari Indonesia berboeat. Sekarang jang dapet giliran jalah bangsa koelit poetih.
Boeat banjak dari kita orang segala apa jang di berboeat oleh orang koelit poetih, roepa’nja ada begitoe menarik hati dan di anggep sebagi apa² jang paling djempol, sampe kita bikin diri kita mendjadi boewah-tertawaan’nja itoe bangsa, jang kita ingin tiroe.
Pergaoelan Tionghoa peranakan sekarang soedah bisa oendjoek satoe oewa jang potong ramboet’nja. Rok-nja di bikin pendek begitoe roepa, menoeroet permintaan’nja sang Mode, jaitoe dari atas tambah pendek tambah baek, dari bawah makin tinggi makin bagoes.
Ini masih bisa di mengerti dari satoe gadis jang oemoem’nja baroe belasan taon. Maar dari satoe oewa jang pantes djadi ‘mah’nja orang, itoe terlaloe.
Begitoelah pada beberapa hari beselang saja masoek ke salah satoe toko, jang djoeal matjem² kaen dan tjita.
Dan siapa pembatja, jang saja ketemoe di sana? Tida lebih tida koerang dari itoe oewa jang saja maksoedken di atas.
Oesia’nja saja taksir soedah lebih lebih dari 50 taon, tapi kaos jang ia pake warna’nja merah-moeda (*pink), begitoe djoega ia poenja pakean, ramboet’nja di goendoel sebagi banjak siotjia kita model sekarang.
Tjoema beda’nja, djika jang di maksoedken belakangan ini djitok’nja masih klemis, itoe oewa poenja koelit di batang leher’nja soedah begitoe mangkak dan kripoetan, hingga boeat siapa jang liat itoe, ia bisa terbitken perasa’an seperti djoega lagi liat sepotong koelit kerbo jang soedah di rendem dalem aer-kapoer beberapa minggoe.
Selaen’nja pake itoe pakean jang gila boeat ia, oewa kita tida merasa poewas kaloe tjoema dengen begitoe sadja ia bikin demonstratie dari prempoean Tionghoa poenja geschiktheid boeat mendjadi imitatie, barang tiroean’nja segala bangsa.
Dikedoea tangan’nja orang bisa liat sepasang gelang jang bagoes, malah di leher’nja ada tergantoeng satoe kaloeng jang pake gandolan, sementara koeping’nja di hiasin sama seperangkat anting².
Saja tida sangkal, memang itoe barang jang mendjadi barangnja perhiasan satoe prempoean, tapi toch djika kita poenja oesia soedah begitoe tinggi, och, nama’nja sadja kita masih satoe prempoean, tapi tida poenja kepantesan dan keeilokan boeat pake itoe semoea, soedah lama di koeboer.
Saja tida bermaksoed boeat bikin maloe pada itoe oewa, tapi djoestroe prempoean Tionghoa jang begitoe modern, ini jang bisa bikin kita semoea mendjadi boewah-tertawaan’nja barang siapa jang liat.
Djangan lantas semoea ditelan mentah² sadja, asal kita mempoenjai doeit boeat beli dan pake.
II. Inilah tjaranja Njirih.
Liat Oewa Bien
Tjamboek Berdoeri.
Saptoe, 19 Djanoeari 1929.
I. Hoedjin Hwee (satoe poenja akibat)
Ach, pembatja! Djika pembatja taoe bagimana kadang² ini Pridato di toelis dengen hati jang patah dan pikiran jang kaloet, baroelah pembatja mendoesin jang sesoenggoeh'nja pekerdja’an koran ada satoe pekerdja’an jang sedikit'nja bisa bikin pendek kita poenja oemoer, lantaran „makan hati”.
Di antara pembatja tida ada jang taoe, bagimana soesah boeat saja ini kali toelis Pridato.
Pikiran saja sendiri beberapa hari ini sanget kaloet, di sebabken oleh „kemadjoean prempoean Tionghoa”.
Saja poenja istri, Hoedjin Tjamboek Berdoeri, baroe dalem boelan ini hati’nja ketarik sama „perkoempoelan prempoean Tionghoa jang ingin soepaia deradjat'nja kaoem prempoean di bikin sama rata dengen kaoem lelaki” dan agar itoe maksoed bisa kesampean, hoedjin² kita tida dapet laen djalan dari pada kadang² adaken „vergadering” di mana segala soal jang perloe dan jang tida perloe di bitjaraken. Tentoe sadja sesoeatoe soeami dianggep tida terlaloe penting boeat djoega toeroet mengetahoein apa sadja jang soedah di madjoeken, di roendingken dan di poetoesken dalem itoe perkoempoelan.
Lantaran pengaroeh'nja itoe perkoempoelan jang mempoenjai toedjoean boeat rendengken kaoem prempoean dengen kaoem lelaki, maka tida heran jang Hoedjin Tjamboek Berdoeri sekarang atoer roemah-tangga'nja laen sekali dari pada biasa'nja. Boekan sadja saja sekarang moesti lakoeken kewadjiban saja sebagimana biasa boeat tjari penghidoepan, malah djoega saja di wadjiken ambil over sebagian dari pekerdja’an tjabolang saja, jaitoe oeroes roemah-tangga, rawat anak², bikin peritoengan sama koki, liatken pekerdja’an baboe enz².
Sesoedah poelang dari kantoor, pembatja djangan kira jang saja lantas bisa dapetken saja poenja tjangkir koffie, tapi sekarang di atoer, lebih doeloe saja moesti bantoe rawat anak²; kamoedian sedoeh aer boeat toeang teh; lantas denger verslag dari koki apa sadja jang ia soedah beli di itoe hari dan djoega bikin staat begrooting boeat belandja di esok'nja.
Sementara Hoedjin Tjamboek Berdoeri (soepaia tida di kateken berlakoe tida adil) adepin medja-toelis, batja koran, kaloe maoe minoem koffie soedah sedia, pendek'nja ia maoe „trima mateng” semoea, sebagimana doeloe memang mendjadi sematjem voorrecht saja.
Doea minggoe sekali ia koendjoengi itoe vergadering dan djika ia dateng, Walah! Laga'nja seperti djoega ia soedah mendjadi satoe pahlawan toelen dari pergerakan kaoem prempoean. Aer-moeka'nja jang biasa'nja berseri-seri, sekarang dengen sengadja di keroetken begitoe roepa sampe mirip sama moeka'nja satoe oewa jang oesia'nja soedah deket pada itoe lobang dalem tanah jang nama'nja soedah terkenal. Itoe semoea di lakoeken, saking kepintjoet'nja sama gelaran „pemimpin” jang dalem anggepan'nja banjak prempoean, tida bisa tondjolken poetjoek idoeng'nja di tempat oemoem atawa moeka'nja paling sedikit moesti ada riboean goeratan².
Dan awas djika saja berani boeka moeloet boeat protest tentang ini atawa itoe! lantas dalem sekedjab mata moeloet'nja menggeloentjoer „artikel²” ini dan itoe, semoea mengandoeng maksoed boeat pringetken pada kaoem prempoean jang ia orang di djelmaken dalem doenia djoega sebage manoesia jang hak'nja tida boleh kalah seoedjoeng ramboet dengen hak'nja kaoem lelaki.
Dan kaloe Hoedjin Tjamboek Berdoeri soedah berpidato setjara begitoe, boeat saja tida ada laen djalan dari pada toendoek sadja. Sembari manggoet² boeat njataken „moepakat”, saja gendong anak saja jang paling ketjil, sedeng tangan laen boenjiken krintjingan, sementara moeloet saja tida berenti'nja menjanji fatsal itoe „kambing besar jang lari lantaran oedjan dateng!!”.
Dan kaloe itoe anak soedah tidoer, lantas dateng giliran’nja anak² jang laen jang semoea moesti di gantiin pakean'nja, kamoedian di tidoerken. Bila itoe „kewadjiban” djoega soedah selesai, pembatja djangan lantas kira jang saja soedah abis dienes'nja, Ho! Masih banjak sekali.
Soemi, si koki, di trap, ia itoe di itoe hari beli apa sadja, dan kaloe semoea soedah „klop” lantas saja, di bawah penilikan'nja Hoedjin Tjamboek Berdoeri moesti bikin staat tentang pembelian di esok'nja.
Daging sampi satoe kati seperapat, boentjis 5 cent, garen setengah cent, telor ajam 3 bidji, oedang setjoekoep'nja boeat bikin perkedel, goela satoe kati, teh satoe boengkoes dan begitoe seteroes'nja.
Belon tjoekoep dengen ini hina’an, saja kadang² djoega moesti preksa keada’an di dapoer, apa masih ada tjoekoep banjak persediaan trasi, lombok, meritja, petis, teges'nja „ratjikan'nja dapoer” sebagimana jang biasa di bilang!.
Sementara itoe, Hoedjin Tjamboek Berdoeri, boeat boektiken jang kaoem prempoean djaman sekarang laen sama prempoean djaman koeno, enak²an batja koran dengen adepin setjangkir koffie!.
Dan kaloe pagi, saja tida bisa pergi ke kantoor doeloe, atawa saja soedah moesti bantoe rawat anak², teges'nja kasih ia orang mandi, ganti’in pakean'nja dan liatken makan'nja. Kamoedian anter djoega ia orang ke sekolah. Mendjadi boekan sadja saja dalem roemah di toeroenken deradjat'nja sama mendjadi satoe boedjang dalem dienes loear biasa, tapi djoega di tempat oemoem saja moesti lakoeken rol'nja baboe.
Inilah ada boeah'nja kemadjoean jang kaoem prempoean Tionghoa inginken.
Masih baroe sadja bisa adaken perkoempoelan jang toedjoean'nja „samaken hak'nja prempoean dengen hak'nja lelaki” keada’an kaoem lelaki soedah begini. Apa lagi djika kaoem prempoean soedah „madjoe” betoel. Boleh djadi ia orang aken kirim motie pada Giam Lo boeat protest dan minta boeat selandjoet'nja kaoem lelaki jang haroes mengandoeng anak dan pikoel semoea sengsara'nja.
Tida lama lagi, kaoem prempoean jang doedoek di depan medja-toelis dan kita, kaoem lelaki, djongkok di depan'nja dapoer; kaoem prempoean pegang pena, kita jang pegang kipas-dapoer. Dan kaloe kaoem prempoean panggoel senapan dan madjoe ke medan preang, adalah kita jang panggoel anak dan madjoe ke soemoer boeat tjoetji popok!!.
Taoekah pembatja kenapa sekarang hati saja rasa'nja seperti pepet????
II. Swara Pobliek.
Liat Oewa Bien dan Vs Pewarta
Tjamboek Berdoeri.
Saptoe, 26 Januari 1929.
I. Doea-Doea'nja boleh madjoe berbarengan!!
Liat Vs Pewarta
II. Boeroeng Hong dan koekoek-beloek
Liat Vs Pewarta.
Tjamboek Berdoeri
